Jobb kvar som helst i verda – sitt gratis på Peak Sunnfjord

Det er ikkje vanskeleg å skjønne forretningsidéen til Pål Anders Kårstad og Peak Sunnfjord. Saman med nokre ivrige gründerar starta han opp kontorfellesskapet med eit einaste mål: Å lage ein kul arbeidsplass som tiltrekker seg unge menneske.

Ein del av suksessoppskrifta til Peak Sunnfjord er det unike miljøet som kjem av at folk frå mange bransjar og bedrifter jobbar under same tak. Det gir inspirasjon og utveksling av kompetanse. Felles prosjekter oppstår over lunsjen, og ikkje minst er det svært sosialt.

Perfekt for fjernarbeid
Remote er eit lånt ord frå det engelske vokabularet, og står seg eigentleg betre på originalspråket. Ein grei måte å omsetja det til norsk blir fjernarbeid, men det høyrest kanskje meir ut som utvekslingsarbeid. Og det treff ikkje heilt på kva remote-løysinga til Peak Sunnfjord eigentleg går ut på.

Så.. kva betyr det eigentleg å jobbe remote – og korleis kan du gjere det her på Peak Sunnfjord? - Med Remote-ordninga kan du ta med jobben du allereie har til innovative Sunnfjord, og sitte eit år gratis hos oss. Det gjeld for dei som melder flytting til Sunnfjord frå ein anna kommune. Vi ønsker å legge til rette for at det blir enklare å flytte hit. Ta ned terskelen. Det er viktig for rekrutteringa. Viss partnaren din får jobb i Sunnfjord kan du bli med, og ta med deg jobben utan å tenke på at du også må få jobb lokalt med ein gong. Samstundes kan tilflyttarane trygge arbeidsgivaren sin med at ein blir sittande i eit spennande, offensivt og inspirerande miljø, forklarar dagleg leiar i Peak Sunnfjord, Pål Anders Kårstad. Det er viktig å ha eit godt arbeidsmiljø rundt seg, sjølv om ein ikkje jobbar i same bedrift. Det får du her på Peak Sunnfjord.

Bilete: Stemninga er alltid god på Peak Sunnfjord. Tatt av Photoevent

Remote Sunnfjord er eit tiltak i regi av Sunnfjord Utvikling i samarbeid med Remote Norge. Kathe Arnesen var prosjektleiar for prosjektet lokalt, og fortel at fleire ønska å flytte ut av storbyane. – Spesielt etter pandemien såg vi eit lite skifte i arbeidsmarknaden. Stadig fleire vil minske tidsklemma, og få kvardagslogistikken til å gå opp. Førde er heilt topp sånn sett. Urbant og innovativt – men utan den store rushtrafikken, smilar ho.

Er du enno ikkje overtydd? Her er 5 gode grunnar til å ha Remote arbeidsplass på Peak Sunnfjord:

1. Fleksibiliteten er høg!
Med ei slik ordning kan du jobbe kvar som helst i verda, frå Førde. Det gir større friheit til å tilpasse arbeidstida etter eige personlege behov.

2. Jobb sentralt og urbant
Peak Sunnfjord ligg midt i Førde sentrum. Her har du alt i direkte nærleik, og det er enkelt å få kvardagslogistikken til å gå opp. Samstundes har Pål Anders og gjengen lagt mykje tid og energi i design og interiør. Her er det moderne, leikent og uformelt med høg kvalitet.

3. Eit innovativt og spirande miljø
Førde er kanskje også den mest spennande småbyen i Noreg når det kjem til innovasjon og entreprenørskap. Menneska, miljøet og selskapa dei har klart å etablere her, er utan sidestykke. Sjå for eksempel på Tibber. På Peak får du eit dynamisk kontorfellesskap for blant anna gründerar, oppstartselskap, etablerte teknologibedrifter og verkemiddelapparatet.

4 Kostnadssparande
Du betaler ikkje ei krone for å jobbe Remote frå Peak Sunnfjord det første året. Internett, kaffi, straum, kontorpult – alt du treng blir tatt hand om.

5. Struktur og rutine
For mange kan det være utfordrande å oppretthalde struktur og rutine når ein arbeidar heimanfrå. Et kontorfellesskap gir ein tydeleg arbeidsplass og kan hjelpe med å skile arbeid og fritid.

Det er altså mange gode grunnar til å ta med jobben til Førde og Peak Sunnfjord. Er du interessert i eit år i spennande Førde? Du finn meir informasjon og kan melde di interesse her: https://www.remotesunnfjord.no/