Den største leigetakaren på Peak Sunnfjord – som ingen har høyrt om?

Det skjer mykje i Sentrum Sør. Eit område i utvikling – med mykje potensiale. Området er pussa opp, og skin no på sørsida av Jølstra der både nye og godt etablerte bedrifter held til. I denne artikkelserien tek vi dykk med inn i nokre av dei, og gjev eit innblikk i det som rører seg på sørsida av Førde sentrum.

Det er ikkje vanskeleg å forstå forretningsidéen til Pål Anders Kårstad og Peak Sunnfjord. Saman med nokre ivrige gründerar starta han opp kontorfellesskapet med eitt einaste mål: Å lage ein kul arbeidsplass som tiltrekker seg unge menneske. Her skal det vere like kult og urbant som i dei store byane, og målet er at ein ikkje saknar Oslo eller Bergen. Når statsministeren og statsrådar kjem tilreisande berre for å sjå på miljøet han har skapt, kan vi verkeleg seie at satsinga har vore vellykka.

Størst plantesamling og legendarisk bollefredag
Proresult er ein viktig del av mangfaldet på Peak Sunnfjord. I første etasje i det livlege fellesskapet har dei laga kontorlandskapet til sitt eige. Dei er den største leigetakaren på Peak, har den største plantesamlinga på huset og arrangerer legendariske bollefredagar. Men dei er også ein godt bevart hemmelegheit. Leiar for marknad og kommunikasjon, Bent Are Iversen fortel at han nokre gonger opplever at «ingen» har høyrt om dei. – Det vi driv med i Proresult er ofte prega av lange prosessar og krev langsiktig planlegging hos bedriftskundar. Lite klikk og hent her – og det gjer oss nok litt ukjent for mannen i gata. Men å, innimellom, vere ei skjult perle i marknaden toler vi altså, smiler han.

“Men å, innimellom, vere ei skjult perle i marknaden toler vi altså. ”

— Bent Are Iversen

Meir tid i gravemaskina
For kva gjer eigentleg ei bedrift som Proresult? Ein forstår ut i frå namnet at dei jobbar mot profesjonelle resultat, og ut i frå nettstaden at det handlar om programvarer for prosjektstyring. Men kva betyr det? – Vi kuttar kontorarbeid for bygg- og anleggsbransjen. Dei har enorme dokumenterings- og effektivitetskrav. HMS, kvalitetsstyring, personell, logistikk og anbod – alt skal styrast på ein fornuftig måte. Dette er ein bransje som helst vil bruke tida si i gravemaskina, og vi leverer eit system som gjer at dei får brukt mesteparten av tida si til akkurat det. Vi sørger for at alt går på skinner i ei saumlaus programvare. Hos oss får dei eitt av marknaden sitt mest fleksible styringssystem, som gjer at bedriftene kan kutte kontorarbeid samstundes som dei får betre kontroll og rutinar, forklarar Bent Are ivrig. Krav til dokumentasjon for ei trygg og sikker drift i bygg- og anleggsbransjen er strengt regulert. Det er mange lover og reglar å følge innan HMS. Då er det fint for bedriftene at Proresult leverer alt dei treng for å balansere myndigheiter- og effektivitetskrav.

- Den beste allrounderen på marknaden
Proresult skil seg frå konkurrentane sine på fleire område. – Eg vil seie at vi har heile pakka her. Vi er gode på mykje, og leverer eit komplett system. Det er ikkje for enkelt, men heller ikkje for vanskeleg. Det gjer oss nok til den beste allrounderen på marknaden, kjem det frå Bent Are. Og bedrifta kan skilte med mange lojale kundar. Dei kjem stadig tilbake og vil ha meir av systemet, og nokre av dei har vore med sidan starten.

Fleire Norgesmeistrar i leiargruppa
Proresult sitt system kan feire 20 år, og den vellykka bedrifta vart eit AS for 18 år sidan. Det er mange år med erfaring i sekken for dei tilsette. På spørsmål om mykje har endra seg på den tida, svarar marknad- og kommunikasjonsleiaren både ja og nei. – Verda har endra seg, men kanskje til fordel for systemet vårt. Meir skal dokumenterast, og krava til digitalisering blir strengare. Myndigheitene er meir påkopla tema no enn for nokre år tilbake. Eg trur det viser at samfunnet har meir behov for programvarene våre, forklarar han. Bent Are trekk også fram at det har vore oppturar og nedturar i bransjen gjennom åra, men med gode styringssystem har ei bedrift større sannsyn for å klare seg godt. - Vi er òg så heldige at gründeren av selskapet, Andreas Haug, endå er med. Det gir soleklare fordelar. Ikkje berre innanfor drift og utvikling – men også på bedriftsidrettssida, ler Bent Are. Proresult kan skilte med ikkje berre ein – men to NM-vinnarar i leiargruppa. Andreas har kongepokal i volleyball, og fungerande dagleg leiar Jøran Laukeland har tre noregsrekordar i sprint. Han susar frå alle på 100 og 200 meter, og den spreke leiargruppa bidreg til at bedrifta er Peak Sunnfjord sitt beste lag under Helse Førde sin årlege stafett. Men kan audmjukt ikkje ta heile æra.

Stor nyheit
Innan området HR, eller personaladministrasjon har mykje skjedd dei siste åra. Oppbevaring og handtering av personalopplysningar er ikkje som det ein gong var. Dette veit Proresult alt om, og dei har nyleg lansert eit HR-program. – Vi trur at dette programmet kan konkurrere med dei store fiskane. Programmet blir bygd på erfaringa vår. Vi er tett på kundane våre, og ser kor skoen trykker, fortel han.

“Det beste med å høyre til på Peak Sunnfjord? Å sleppe å bestille dopapir”

— Ler Bent Are Iversen

Førde sitt svar på Silicon Valley
- Det beste med å høyre til på Peak Sunnfjord? Å sleppe å bestille dopapir, ler Bent Are. Om det har vore eit stort problem tidlegare kan ein jo berre undrast over. Men han fortset: - Neida. Det er ein eigen dynamikk på huset, i gangane og til lunsjen. Her er mange bedrifter i teknologibransjen, og lett å spørje kvarandre om hjelp eller råd. Eg vil sei det er ein sosial delingsøkonomi i praksis, og det skjer stadig verdiskaping på tvers av bedriftene. Bent Are kallar Peak Sunnfjord ein liten versjon av Silicon Valley. Og kven som er dalens svar på Mark Zuckerberg, får ein vurdere sjølv. Men at Peak Sunnfjord og tilhøyrande vekstmiljø passar godt inn i dynamikken i sentrum sør er det ingen tvil om.

Sterk, lokal forankring
Med hovudkontor i Førde, og avdelingskontor i både Lillestrøm og Dale er Proresult ei solid, lokal bedrift i stadig utvikling. Alle eigarane bur i regionen, og selskapet har vakse seg til ein stabil og innovativ aktør innan prosjektstyring for bygg- og anleggsbransjen.

Trass i at «ingen» har høyrt om dei, er Proresult ei viktig brikke i ein krevjande marknad. Dei hjelper bedrifter over heile landet med å få kontroll på dokumentasjon, HMS, kvalitet og drift – og gjer det enklare for folk i bransjen å bruke tida si der dei trivst best. Med ei stadig utvikling av programvara og eit komande HR-system på veg, ser framtida lys ut.