Førde sin største endorfinfabrikk

Det skjer mykje i Sentrum Sør. Eit område i utvikling – med mykje potensiale. Området er pussa opp, og skin no på sørsida av Jølstra der både nye og godt etablerte bedrifter held til. I denne artikkelserien tek vi dykk med inn i nokre av dei, og gjev eit innblikk i det som rører seg på sørsida av Førde sentrum.

Rekordvekst på Spenst Førde
I store lokale midt i sentrum sør held Spenst Førde til. Med sine 3 500 kvadratmeter er dei ein av Norges største Spenst-treningssenter, og det største senteret i vår region. Dei er ein del av Helsehuset Førde, og i tillegg til Spenst finn du også fysioterapeut, psykolog, lege, urolog og manuellterapeutar under same tak. Praktisk, uansett kva ein treng hjelp til med helsa. Og skulle du ta turen inn dørene på Spenst Førde finn du blant anna ein stor CrossFit-boks, yoga, stort løperom, eige tøyerom, areal for eigentrening og spinning - lista er lang. Dagleg leiar Kent Roger Engdal finn det enkelt å forklare konseptet sitt: - Vi er Førde sin største endorfinfabrikk, ler han. Sjølv om dei kjem frå store senter i Oslo eller Bergen blir dei overraska over størrelsen og utvalet vårt. På Spenst er det trening for alle. Med kring 2 500 flotte medlemmar er det klart at tilbodet må vere variert. Vi har alltid vore opptatt av å finne noko som passar for alle, frå godt trena, til heilt ferske. Difor har vi eit stort utval i gruppetimar også. Vi køyrer mellom 50 og 60 timar i veka, og ser ein stor vekst, forklarar han. Og vekst i gruppetimar kan dei verkeleg påstå å ha hatt. Berre hittil i år har dei hatt ei auke på 73% i bookingane, og har difor sett opp mange ekstra timar.

God stemning - og god plass beskriv Spenst Førde godt. Foto: Emil Rasmussen, VOOKAL

Kva er det som gjer gruppetimar og trening spesielt populært no? Er det nyttårsføresetta som framleis held?-  Tja. Det er jo litt samansett, forklarar Hanne Lien. Ho er assisterande dagleg leiar på Spenst, ernæringsrådgjevar gjennom Lien Helse (i samarbeid med Spenst), ansvarleg for testlaben og instruktør.- No har vi nettopp utvida og pussa opp litt. Vi har flytta yogarommet og gjort det meir tilgjengeleg, og ser kanskje litt effekt av dette. Gruppetimar har vi satsa litt meir på, og vi forsøker å fornye oss heile vegen. Det trur vi medlemmane likar, og vi får god respons når nesten alle timane våre blir fulle. Kanskje det har vore med på aukinga innan alle våre tilbod. Ikkje berre yoga, men CrossFit, styrke i sal, spinning, slynge, step, pilates – ja alt har auka, smiler ho. Ho trur ikkje nyttårsføresetta held i endå, men at Førdefolket er flinke på å bruke treningssenter, og komme seg på trening. Spenst har høg prosent medlemsandel. – Akkurat no er for eksempel løping og Hyrox veldig i vinden. Vi har ein stor CrossFit-boks, og den har vore populær sidan starten. Det er den fortsett, og det er kjekt. Mange av medlemmane våre vil ha desse korte, effektive og tunge øktene – ofte forkorta til HIIT (high intensity interval training), og då må vi jo gje dei det, seier ho.

Korte, effektive økter er i vinden! Foto: Emil Rasmussen, VOOKAL

Trendar og nye treningsformer
Hyrox er ein verdskjend treningsform som tar Noreg med storm for tida. Her handlar det om å bli sliten og sveitt på ikkje så alt for lang tid. Hanne og Kent Roger trur denne forma for trening appellerer til folk fordi den ikkje er så vanskeleg å få til, samstundes som du er blitt både sveitt og støl. – Øktene er ikkje så avanserte, og kanskje litt folkelege. Det er noko alle kan klare, og det trur vi folk likar. Vi ser stadig fleire på desse timane, fortel Hanne. For dei handlar det også om å utvikle og investere i det eksisterande tilbodet, noko dei gjer – og har gjort heile vegen.

“Spenst førebur seg til VM i vektløfting i oktober. Då samlar Førde heile eliten, og treningssenteret blir vertskap for utøvarane.”

Kent Roger sine beste tips for å kome i gong
Kent Roger og Hanne har vore i bransjen i over 20 år. Dei veit kva dei snakkar om, og har sett trendar kome og gå. No ser dei ei endring dei likar. – Trening er ferskvare og krev kontinuitet. Før var det mykje meir sesongbasert trening. Eg syns folk er flinke til å møte opp heile vegen, og gjere treninga til ein livsstil. Det er stor forskjell, og det er så bra for dei som trenar. Men 75 % av nordmenn er for inaktive, og det er eit for høgt tal. Enno fleire nordmenn burde vere i aktivitet, fortel Kent Roger. Og skulle du vere ein av dei som ikkje har kome i gong enno, men føler du burde? Då har Spenst-sjefen nokre gode råd. – Vi har alle vore nye ein gong. Be om hjelp, ha ein plan og ikkje begynn for hardt. 2-3 økter i veka er heilt topp å starte med, og det treng ikkje vere vanskeleg, fortel han entusiastisk. På Spenst har dei eigne personlege trenarar, og er du heilt ny får du ein PT-start. Hjelp, rettleiing, individuell tilpassing og omvising på senteret er inkludert i pakka. Det trur dei to tilsette er med på å senke terskelen, og gjere det enklare å kome i gong.

Trening er ferskvare, og det veit dagleg leiar Kent Roger alt om. Foto: Emil Rasmussen, VOOKAL

Fantastisk plassering – gratis parkering
Midt i sentrum sør ligg altså eit av landets største Spenst-senter. Og lokasjonen kan dei to leiarane ikkje klage på. – Plasseringa vår er heilt fantastisk, kjem det fort frå Kent Roger. Vi har god plass, og det er enkelt å finne gratis parkering. Etter at området blei pussa opp har vi den finaste flisen å springe på, så når vêret betrar seg kjem vi til å køyre enno fleire utetimar her. Hanne legg til: - Det er veldig praktisk og sentralt, og kjekt når det no i tillegg er blir kjempefint her. Vi kunne ikkje tenke oss ei anna plassering, og eg gler meg til å servere smoothie til medlemmane våre etter ein hard utetime, avsluttar ho med eit smil.