Pikant: Mat, opplevingar og godt selskap i hjartet av sentrum sør

Det skjer mykje i Sentrum Sør. Eit område i utvikling – med mykje potensiale. Området er pussa opp, og skin no på sørsida av Jølstra der både nye og godt etablerte bedrifter held til. I denne artikkelserien tek vi dykk med inn i nokre av dei, og gjev eit innblikk i det som rører seg på sørsida av Førde sentrum.

Månadar blei til år
1. november tok Susanne Nyttingnes Kragseth over stafettpinnen på mat- og vinhuset Pikant. Sjølv om ho er relativt ny som dagleg leiar, er ho ikkje eit ukjent fjes i den populære restauranten. Ho begynte tilbake i 2020, og skulle eigentleg berre vere i tre månadar. Men så skjer livet, slik det ofte gjer, og no leiar ho restauranten som år etter år tronar på førsteplass over spisestadar i Førde på Trip Advisor. Det er lett å sjå at ho brenn for jobben, og ho boblar av entusiasme når ho fortel om restauranten sin. – Når eg fekk førespurnad om å ta over som dagleg leiar kunne eg ikkje seie nei. Berre sjå deg rundt, seier ho og slår ut armane. – Å sitte i 2. etasje på verandaen på sommaren, kjenne sola varme midt i fleisen, ha Jølstra silande i bakgrunnen medan du et eit godt måltid. Gjerne kombinert med noko kaldt i glaset og godt selskap – det finst knapt noko betre, smilar ho.

Dei første månadane ved styringsroret har flydd forbi. Ho starta midt i ein travel julebordssesong, og sjølv om det har vore mykje å gjere, har det vore kjekt. Susanne skryt av eigarane og styreleiarar som har vore støttande i den hektiske starten. – Dei har hjelpt meg dersom det har vore noko, og samstundes gitt meg rom til å finne ut av ting – og ikkje minst finne på ting. Det set eg pris på, fortel ho.

Det har vore ein travel start for Susanne Nyttingnes Kragseth på Pikant. Foto: Emil Rasmussen, VOOKAL

Ikkje den typiske burgarsjappa
Kundane på Pikant skryt ofte av både maten og servicen, og det har vore konseptet deira sidan starten. Kvalitetsråvarer som gir kvalitetsmåltid. Menyen endrar seg kvar veke, og på tysdagar får dei ny fiskerett. – Dei tilsette på kjøkkenet er så dyktige. Saman forsøker vi å fornye tilbodet kontinuerleg, og plutseleg dukkar det opp ein idé som vi berre må prøve ut, fortel ho. Men ein ting kan dei aldri ta vekk frå menyen. Hamburgaren er i storform, og går visst aldri av moten. – Eg hadde ikkje trudd at hamburgar skulle vere signaturretten vår, men slik er det, ler Susanne. Burgaren er altså bestseljar, og leiaren trur det kjem av den uslåelege, men enkle kombinasjonen av kjøtt, brød og godt tilbehøyr. Og skulle du få skikkeleg lyst på burgar, men ikkje har mogelegheit til å gjeste restauranten, sel dei den faktisk som takeaway.

Kjøtt, brød og tilbehøyr. Enkelt, og så godt. Foto: Emil Rasmussen, VOOKAL

Halshogd utan karaoke
Sjølv om mat er hovudattraksjonen, ønsker Pikant å vere meir enn god mat og drikke. Dei vil vere ein levande stad der ting skjer og ein stad for kjekke arrangement. Og det har verkeleg Susanne tatt tak i. – Akkurat no testar vi ut eit nytt prøveprosjekt; fast karaoke annankvar fredag. Det har vore veldig populært, og folk er engasjerte. Klart det er forskjellig nivå på synginga, men det skal ikkje stå på det. Gjestane byr på seg sjølv og har det kjekt. Eg fekk beskjed om at eg blir halshogd om vi gir oss med det, så den lar vi stå i tida som kjem, seier ho med glimt i auget. Og framover fyllast aktivitetskalendaren seg opp. Susanne kan freiste med både pubquiz, musikalske kveldar, ølsmaking, sofasessions og trubadurar. Samstundes held ho litt igjen. Ho ser litt hemmelegheitsfull ut, og har nokre arrangement i ermet som ho ikkje vil dele heilt endå. – Folk treng å komme seg ut. Januar var ein litt stille månad, no er det på tide at vi luftar oss meir. Det skal vi gjere noko med, smilar ho.

““Eg fekk beskjed om at eg blir halshogd om vi gir oss med det, så den lar vi stå i tida som kjem””

Susanne har mange spennande arrangement på agendaen, og fleire held ho tett til brystet enn så lenge. Foto: Emil Rasmussen, VOOKAL

Framover får vi berre følge med på kva spennande arrangement Susanne og teamet hennar har på lur. Éin ting er sikkert – dei kjem til å halde fram med å skape liv og gode opplevingar i sentrum sør. No handlar det berre om at vi som bur her, tek del i det. – Eg anbefaler heile Førdefolket å bruke dei spise- og utestadane vi har. Vi må ta vare på det gode tilbodet medan vi har det. Det hjelper ikkje å vere etterpåklok og klage over manglande tilbod, avsluttar ho.